تاجیکستان: صادرات برق خود را به افغانستان افزایش میدهیم
مقامهای دولتی تاجیکستان میگویند که کشورش در سال جاری، صادرات برق خود را در این کشور افزایش میدهد.
محمدعمر عصازاده، معاون اول شرکت برق تاجیکستان گفته است که شرکت برق تاجیک و شرکت انرژی افغان، چندی قبل توافقنامهی را در مورد افزایش صادرات برق به افغانستان امضا کرده است.
به گفته او، بر اساس این توافقنامه صادرات برق تاجیکستان به افغانستان، ۲۰۰ میلیون کیلووات افزایش خواهد یافت.
عصازاده افزوده که در یک سال گذشته تاجیکستان به افغانستان، ۱٫۳ میلیارد کیلووات برق صادر کرده است.
این درحالی است که پیشتر وزیر انرژی و ذخایر آب تاجیکستان، از توقف صادرات برق به افغانستان خبر داده بود.
به گفته او، تاجیکستان در فصل زمستان نمیتواند، به افغانستان برق صادر کند، اما در تابستان صادرات برق خود در این کشور را افزایش خواهد داد. افغانستان بیشترین برق مورد نیاز خود را از تاجیکستان و ترکمنستان خریداری میکند.