روسیه: ارتش تاجیکستان را با سلاح‌های مدرن تجهیز می‌کنیم
سرگئی شایگو، وزیر دفاع روسیه می‌گوید که کشورش ارتش تاجیکستان را با سلاح‌های نظامی مدرن تجهیز می‌کند و همچنان به نوسازی نیروهای این کشور کمک خواهد کرد.
وی در ادامه افزوده که مسکو و دوشنبه به منظور افزایش صلح و ثبات در منطقه با توجه به تهدیدات ناشی از وضعیت پیچیده افغانستان، تمرینات مشترک نظامی برگزار می‌کنند.
شایگو این اظهارات را در سفرش به تاجیکستان، برای شرکت در نشست شورای وزرای دفاع کشورهای همسود بیان کرده است.
وی افزوده که مسکو با هدف تقویت نیروهای تاجیکستان، به این کشور تجهیزات نظامی مدرن ارسال می‌کند.
شایگو همچنان گفته است که در دانشگاه‌های روسیه، متخصصان حرفه‌ای ارتش تاجیکستان، رایگان آموزش داده می‌شوند.
وی در ادامه اهداف روسیه و تاجیکستان در تقویت امنیت و حفظ ثبات در منطقه آسیای مرکزی را مشترک عنوان کرده است.
