بیش از ۱۰۰ عضو داعش در تاجیکستان بازداشت شدند
وزارت داخله تاجیکستان از جلوگیری دوازده حمله تروریستی در این کشور، طی شش ماه اخیر خبر داده است.
رمضان رحیم زاده، وزیر داخله تاجیکستان در یک نشست خبری گفته است که در این مدت دست‌کم ۲۲۸ تن به اتهام ارتباط با تروریستان بازداشت شده‌اند.
اما آقای رحیم زاده افزوده که از میان این افراد، حدود ۱۰۴ تن از آنها به گروه تروریستی داعش پیوسته بودند.
به گفته او، از این افراد مقدار زیادی مواد منفجره و مهمات جنگی به دست نیروهای تاجیکستان آمده‌اند.
این درحالی است که در گذشته نیز مقامات تاجیکستان از پیوستن هزار شهروند این کشور به داعش خبر داده بودند.
اما مقامات امنیتی تاجیکستان گفته اند، تاکنون در عملیات مختلف آنها، بیش از ۳۰۰ عضو گروه داعش کشته شده‌اند.
از سویی هم، تاجیکستان از افزایش حضور داعش در افغانستان ابراز نگرانی کرده و خواستار مبارزه با این گروه شده است.
افغانستان و تاجیکستان دارای مرز مشترک اند. طی ماه‌های اخیر، فعالیت گروه‌های تروریستی در شمال کشور افزایش یافته است.
